دونیایا اوشاق گتیرمهنین اوچ معناسی وار:
بیرینجیسی اوشاق ایستمه حسی ایله باغلیدیر.
ایکینجیسی اجتماعی فیکیرله.
اوچونجوسو ایسه داها ائقویست(خودخواه) – منی کیم ساخلایاجاق قوجالاندا؟ کیم باسدیراجاق؟
او و یا بو مقصدله اوشاق دوغولور. آتا-آنالار اونو ساخلاماغا باشلاییر. بؤیودورلر. هله بیر آتا-آنا گؤرمهمیشم کی، اوشاغا دئسین :”سن منه هئچ نه ایله بورجلو دئییلسن، چونکی من سنی دوغاندا سنینله هئچ بیر آنلاشما(توافقنامه) ایمضالامامیشام کی، سن منه نه واختسا بورج قایتاراسان. نه ایستهییرسن ائله، ایستهییرسن چیخ گئت، ایستهییرسن قال، ایستهییرسن آت اؤزونو یئددینجی مرتبهدن، بو سنین یاشاییشیندیر“.
بوتون آتا-آنالار دئییر :” سن بیزه بورجلوسان. سن بیزی ساخلامالیسان چونکی بیز سنی ساخلامیشیق. سن بیزیم یاشاییشیمیزین بیر پارچاسیسان. سنه نسه اولسا بیز اؤلریک. سنه نسه اولسا آنان دلی اولار. سنه نسه اولسا آتان اؤزونو اؤلدورر”. باخین بو جملهنی بیر ده یازیرام: “سنه نسه اولسا بیز اؤلریک“. بو بیلیرسینیز بیزیم یاشاییشیمیزی نهیه چئویریر؟
یادینیزا سالین کؤهنه هالیوود فیلملرینی، پولیس جینایتکارلا اوز-اوزهدیر. و جینایتکارا قیشقیریر:” آت سلاحینی یئره“. جینایتکارسا دئییر :” سن آت سلاحینی یئره… بیز سنین سئوگیلینی اوغورلامیشیق بیزه نسه ائتسن اونو اؤلدورهریک“. همین ثانیهیه کیمی هامی پولیسین غالیب گلجگینه اینانیر، آمما سون جملهدن سونرا نه باش وئریر؟ هه اؤزونوز دئیین. یوخ گلین بیر یئرده دئیک. پولیس سلاحینی یئره قویور و دوروم جینایتکارین خئیرینه دییشیر. چیخیش یولو داها دا چتینلشیر.
بیزیم یاشاییشیمیز دا ایندی بئلهدیر. بیز پولیسیک. یاشاییشداکی چتینلیکلر ایسه جینایتکارلار. اما او یاشاییشین الینده همیشه بیزیم آتا-آنالاریمیز وار. اونلار دا دئییرلر :”سنه نسه اولسا بیز اؤلریک. سلاحینی قوی یئره و یاشاییشین عدالتسیزلیکلرینه تسلیم اول. اؤیرش. عادیلش. آرزولارینی اونوت. هئچ یانا گئتمه. یانیمیزدا قال. بیزی ساخلا. بیز دئین بیلیمیوردا گئت، بیز دئدیگیمیز اوغلانا اره گئت. شیکایت ائلمه کی، سن بیزیم بویروقلاریمیزی یئرینه یئتیره-یئتیره اؤز یاشاییشینی ایتیریرسن. قورخما،سنین ده اوشاقلارین اولاجاق،سن ده اونلارین یاشاییشینی قوراجاقسان.اونلاری اداره ائدهجکسن .باخ اوندا دا سن یاشایاجاقسان.چونکو بیزی ده آتا-آنالاریمیز ایستهدیگیمیز کیمی ائتمهمیشدی. بیز ده ایندی سنین یاشاییشینلا یاشایاجاییق. چونکو اؤز یاشاییشیمیزین یاخشی ایللری کئچیب“.
مصرده هامی فرعونون یارادیجی اولدوغونا اینانیردی. اونلارا دئییلیردی کی، هامی حیاتینا گؤره فرعونا بورجلودورلار. هندده مال ایستهدیگی واخت ایستهدیگی دوکانا گیریب اورانی داغیدیب تؤکور. سونرا خوشلادیغی مئیوهلردن دیشلهییب دوکانین ایچینی ده قشنگجه باتیریر . گئدندن سونرا ایسه دوکانین یییهسی پرت اولماق یئرینه، یئردهکی پوخا باخیب سئوینیر کی، بودا مقدس اللهین هدیهسیدیر!! داها بیلمیرم یئییر اونو یا یوخ،آمما یوزده یوز سئوینیر.یا.وطنداشلار دؤولته بورجلودورلار.اونا گؤره هر دفعه وئرگی وئرمهلیدیرلر.حتی اؤز ائوینین دامیندا گونش باتریسی قویوب برقینی اؤزون تولید ائدیب دؤولتین ایشیغینی ایشلتمهسن ده اونا گؤره سندن وئرگی آلاجاقلار.چونکو سن اونلارین گونشیندن ایشیق گؤتورورسن!! گؤرورسونوز بیز حیاتا نه قدر بورجلا گلمیشیک؟ آمما ایضاحلی لوغتده “بورج” سؤزو بئله ایضاح اولونور. “کیمدنسه خواهیش اولونوب آلینان و واختیندا قایتاریلاجاغی حاقدا سؤز وئریلن مال”. ایندی گلین باخاق بیز دوغولاندا کیمدنسه خواهیش ائتمیشیک؟ منیم یادیمدا گلمیر. یوخ، ائله بیر شئی اولماییب.قایتاریلماسی دانیشیلمایان بیر شئی ایسه هدیهدیر.هدیه بیزه گؤرهدیر و اونو بیز قایتارماق مجبوریتینده دئییلیک. سان کی، سیزه کیمسه هدیه وئریر. بیر ایل سونرا اونو گئری ایستهییر!!! سیز او آداما نئجه باخارسینیز؟ من دئیرم کی، آخماقدی یقین.
ایندی ده ائلهدیر. هامی بیزه نه ایسه وئریر و بیزی بورجلو چیخاریر. آمما بیز هئچ کیمه بورجلو دئییلیک، چونکی هئچ کیمدن بورج ایستهمهمیشیک.
یاشاییشیمیزی نئجه ایستهییریکسه ائله ده یاشایاق. هئچ بیر سؤزلشمه(معاهده) یوخدور. حتی ان غیری-دئموکراتیک محکمه بئله بیزی سوچلایا بیلمز. چونکی هر بیر “سنه فیلان شئی وئریبلر” جملهسینه جاوابینیز وار- “وئرمزدیلر. خواهیش ائتمهمیشدیم کی وئرهلر”…
Posted by urmulu85 
